អន្តរជាតិ៖ អ្នកនាំពាក្យក្រសួងការបរទេសចិនបានថ្លែងនៅថ្ងៃពុធម្សិលមិញនេះថា សហរដ្ឋអាមេរិកមិនមែនជាភាគីនៃបញ្ហាសមុទ្រចិនខាងត្បូងនោះទេ ហើយបានព្រមានទៅកាន់ហ្វីលីពីនថា ការអូសទាញប្រទេសផ្សេងទៀតក្នុងចេតនាដើម្បីបង្កជម្លោះបន្ថែម នឹងកាន់តែធ្វើឱ្យប៉ះពាល់ដល់ស្ថិរភាពក្នុងតំបន់។

សូមបញ្ជាក់ថា កន្លងមកសហរដ្ឋអាមេរិកធ្លាប់បានសន្យាផ្តល់មូលនិធិទំហំ ៥០០លានដុល្លារសម្រាប់យោធា និងកងកម្លាំងឆ្មាំសមុទ្ររបស់ហ្វីលីពីន ដែលគេចាត់ទុកថាជាទង្វើគាំទ្រដ៏ធំធេងពីសហរដ្ឋអាមេរិកទៅកាន់ហ្វីលីពីន ដែលប្រទេសអាស៊ីអាគ្នេយ៍មួយនេះបានប្រឈមជាមួយចិនលើបញ្ហាដែនទឹកដែលមានជម្លោះនៅក្នុងសមុទ្រចិនខាងត្បូងជាយូរមកហើយ។

លោក លីន ជាន (Lin Jian) អ្នកនាំពាក្យក្រសួងការបរទេសចិននិយាយថា៖ "ចិនបានបញ្ជាក់ជំហររបស់ខ្លួនម្តងហើយម្តងទៀតថា សហរដ្ឋអាមេរិកមិនមែនជាភាគីនៃបញ្ហាសមុទ្រចិនខាងត្បូង និងគ្មានសិទ្ធិធ្វើអន្តរាគមន៍ក្នុងបញ្ហាសមុទ្ររវាងប្រទេសណាមួយឡើយ"៕